السلام عليكم :)
بلغة مختلفة وإسلوب ثاني ... موضوعي هذا دونته للذكرى ... مهم جداً بالنسبة لي إني أكتب هالموضوع... سنتي في بريطانيا شارفت على نهايتها...باقي 4 شهور وأرجع البحرين...والسنة راحت بين الجامعة والتاون وغرفتي في السكن...صادفت عدة اشياء طريفة ومختلفة بس راحت هالأشياء بلاذكر لأني ماوثقتها ولا كتبتها إلا في ذاكرتي... يمكن لأني مقررة بيني وبين نفسي مدونتي هاذي ماتكون للكتابات الشخصية الحميمة...لكن لأفكاري الأعمق والأكبر...ويمكن بعد لأني كنت مقررة إن المدونة هاذي موجودة عشان أمارس فيها هواية الكتابة النثرية... ومابي الأشخاص إلي يدخلون ويقرون لي إنهم يعرفون تفاصيل حياتي الشخصية أو يعرفون اي شي عن شخصي عشان أبي الحكم على كتاباتي يكون موضوعي وبتجرد عن أي شي ثاني... ولكن اليوم غيرت رأيي ولو شوي... وبعدين أنا مو من الناس إلي تقرر وتعتبر قرارها كتاب مقدس... التغيير له يوم و اليوم هو يوم التغيير عندي :)
المهم ... موضوعي اليوم عن شي غريب شوي لا يخلو من طرافه...لاحظته من مده لكن اليوم بس جاتني الفرصة إني أوثق هالشي... بس قبل ما أقول وش هالشي ... لازم أشرح إن البريطانيين شعب متمسك برموزه وشعاراته وأساليبه وتقاليده لدرجة غريبة... يعني على سبيل المثال وليس الحصر... المغسل الي في الحمام وانتوا بكرامه عندهم مثل ماعند الكل له صنبورين واحد ازرق للماي البارد والثاني أحمر للماي الحار- أدري أن هالشي عادي- بس عندنا في البحرين وفي كل الدول الي زرتها في حياتي إن لما تفتح شوي من الصنبور الازرق وشوي من الصنبور الأحمر يجيك شلال لطيف من الماي الدافي أو الفاتر... أما في بريطانيا لا وألف لا... الأزرق ماي مثلج والأحمر ماي يغلي ولاسبيل للإمتزاج :) ... والسبب ببساطه إن هذا نظامهم وهاذي تقاليدهم من سالف العصر والأوان...
بعد موهذا موضوعنا...بس كنت حابة أعطي مثال عن تمسك الشعب البريطاني بتقاليده وبالأشياء الي يجوفه تمثله... أما موضوعنا الحقيقي فهو الطبق البريطاني الشهير ... Fish 'n' chips ... ببساطه عباره عن قطعه سمج فيليه مقليه بجانبها كمية من البطاطس المقليه ... طبعاً لابد للي يجي هني إنه يذوقها... وصار لي الشرف إني جربتها 3 مرات...بس ما أقدر أقول إني حبيتها...أولاً: عادةً الطبق غرقان زيت....ثانيًا: أنا انسانة تحب سمجتها مشوية...ثالثًا: الملح حسب الذوق يعني السمجه جاتني في الثلاث مرات -من ثلاث مطاعم مختلفه-مطبوخه بدون ملح والشي لما ينطبخ بدون ملح مهما رشيت عليه ملح من برا ماراح ياخذ نفس الطعم... بس هالتصريح لو صرحته قدام بريطاني أو بريطانية راح يجيهم سكته قلبيه أو على الأقل أنفطار قلبي ... How dare I ... بنت خليجية من البحرين أهاجم طبقهم الوطني بهالشكل الفضيع...أكيد عندي خلل تذوقي... أو يمكن غيرانه منهم ...أو أو أو إحتمال يعني ماوصلتني الحضارة المطبخية...
خلوني أقول لكم هالقصة... قبل شهرين تقريبًا كنت أجوف برنامج بريطاني على يوتوب طبعاً-لأن التلفزيون هني له قصه ثانية اقصها عليكم ربما مرة ثانية- المهم البرنامج عبارة عن رياليتي شو +مسابقة +شوية طبخ... المتسابقين كانوا اربعة أشخاص من بريطانيا طبعًا... وكان بينهم بنت طول عمرها تاكل أكل راقي وصحي... وفي مرة صرحت إنها ولاعمرها أكلت فيش أند جبس... وإلي صار إن بعض الموجودين معاها حسوا إنها أساءت لهم ولطبقهم الوطني وإنها إنسانة جاهلة...
ببساطة إن كنت في بريطانيا...يجب أن تتذوق طبق الفيش أند جيبس...ويجب أن يعجبك وإن ماعجبك أبلع ريقك وإسكت... وإنت ماشي في السوق راح تلاقي بين كل مطعم ومطعم مطعم آخر يقدم الفيش أند جيبس أو متخصص في الفيش اند جيبس...
بس الشي الطريف إلي لاحظته على مفرق الطريق المؤدي للسكن هو إشارة صغيرة ولطيفة تجوفونها في الأسفل بكل هيلمانها وبهائها وجديتها... بس ماحصل لي الشرف إني ألتقط صورتها إلا اليوم ... شوفوها وحاولوا تعطوني رايكم...
تخيلوا يعني الإشارة تقولك إنتبه هناك مطعم فيش أند جيبس على بعد 200 يارده!!!!
وهاذي صورة للفيش أند جيبس-مو تصويري طبعًا..عمنا العزيز قوقل عطاني إياها- بس هالصورة خالية من الدهون :)
مع إن كل الكلام السابق فيه الشيء الجيد من النقد...ولكن خلينا نكون عادلين وموضوعيين ... حلو إنك الإخلاص للوطن حتى أتفه وأصغر وأسخف التفاصيل...كنت أتمنى إن يكون لنا نفس الفخر والتمسك بكل مالنا... بس يحزني جداً إن مافي ولامطعم في البحرين متخصص بتقديم أكلاتنا وأطبقانا البحرينية ...
كانت معكم من وراء المايكرفون...بأسلوب جديد...انا
